أنا ليه

السلام عليكم ورحمة الله وبركاته

أنا قررت أنشيء المدونة دي عشان أتكلم واقول رأيي في كل حاجة وأي حاجة بدل ما يجيلي إنهيار عصبي ولا أتجنن ،مش مهم أكون بعرف أكتب أو معايا بكالوريوس إعلام ولا ليسانس آداب صحافة ولا حتي يكون معايا شهادة حسن سير وسلوك ” مش عارف إشمعني دي ،بس هيا اللي جات علي بالي” ، أنا تعبت من سكوت الناس وسلبيتهم وانهزاميتهم ،حتي الكلام حرموه علينا !!! ،حاجة تنقط وتشل.

أبويا يقولي ملكش دعوة بحاجة وخليك في حالك ومتتعبناش إحنا مش قد بهدلة الاقسام وأمي تقولي يابني بص لمستقبلك وملكش دعوة بحاجة مش انت اللي هتغير الكون ، أبويا يقولي اللي يقف قدام القطر يدوسه ،أدينا عايشين زي اللي عايشين إشمعني احنا اللي نتكلم يعني ،لو اتكلمت مش هتلاقي حد جنبك ،ماهي الأخلاق راحت والنخوة والشهامة راحت ،ثم يابني البلد دي بلدهم يبرطعوا فيها زي ماهما عايزين ملناش دعوة احنا ،يابني في الفتن دي أحسن حاجة إن الواحد يقعد في بيته ملوش دعوة بحاجة ،البلد مش هينصلح حالها ،وخلينا جنب الحيط أحسن.

عميد الكلية يا بني امشي جوه الحيط “تخيلوا مش حتي جنب الحيط دا جواه” ،وملكش دعوة بالبلد واللي بيحصل فيها.

وأقربائي وأصدقاء أبويا وغيره وغيره …

هو ده الانتماء اللي بيربونا عليه ،بيربونا علي السلبية والانهزامية والدونية.

مش حاسين ومش عارفين أو عارفين ومطنشين وعايزين يريحوا دماغهم ويحطوا لنفسهم مبررات لسكوتهم وضعفهم ،كل اللي بيحصل في البلد مش سببه ثلة الفاسدين القابعة فوق صدورنا ،سببه الرئيسي الانهزاميين والسلبين من الناس ،والعجيب إن أكتر مكان تلاقي فيه الكلام ده هو مصر بلد الفراعنة ،فاستخف قومه فأطاعوه ، هي دي مصر يا عبلة.

مش هتتغير طول ما الناس كده وطول ما الشباب بيتربوا كده.

يا جدعان دا أنا كنت بحل مشكلة لزمايلي وطايلاني أنا كمان أبويا يقولي ملناش دعوة خلينا في حالنا ،متبقاش في وش المدفع.

يالا المهم أنا ناوي أتكلم ومسكوتش ،أقول رأيي في أي حاجة وكل حاجة رأيي صح أو غلط مش مهم أهو في الآخر رأيي ويخصني ،اللي مش عاجبه يناقشني وينقدني نقد بناء مش لمجرد النقد واللي متفق معايا يتعاون معايا في نشره.

عايز أقولكم إني قررت أهدّ الحيط وأعلي الصوت واللي مش عاجبه ياااااااااارب …………

وفي النهاية بقول:

عايزين نفضفض شوية ونقول اللي جوانا  ..  يمكن نلاقي صدي ويتحقق منانا

والسلام ختام.